VÖGLFOUCHER

Neubauer Peter Schitour måcht
und håt sich eppes ausgedåcht:
Mit Schifohrn hun i’s nit a sou,
fohr liaber mit der Lahn derhou.

Wenn der Erb Håns jagern geaht,
kriagt er hintn nouch a Gneat,
die Rechböck schwenzt er – horrido,
durch’n Enterbåch derho.

Und willsch dös Böckl kriagn nou,
no’r ballersch hålt in Bouch derhou.
Zuaschauger schimpfn ganz verdrossn:
„Iatz ham’s in Enterbach derschossn.“

Wous solln mir mit dem Geld gråd toan,
wous ins spendiert hat inser Gmoan?
Dou kaff mer – dös isch iatz koa Witz –
Ein Toupee für insern Fritz!

Herz – Damen werden eingeflog’n,
die Zirler hab’n in Schwanz einzog’n.
Der Gasthof Klotz werd adaptiert –
dort wer’n die Schönen einquartiert.

A kloans roats Liachtl hell und schian
tat dechterscht niam’d in Weg umgiahn,
weil bei dem lötz’n Weihnachtsliacht,
ja eh koa Schwånz mea eppes siacht.

Weihnachtsbeleuchtung wundernett
lei halt a bissl zåndlucket!
Ersatzteile sein disponiert,
z’ Fronleichnam wer’n sie ausprobiert.

Iatz miaß mer amoul saggrisch lob’n
in Kirchnchor für seine Prob’n!
Dös Singen war jå wundernett,
wenn men die Noten find’n tät!

Die Judth führt seit båld fünf Johr
voll Schwung bei ins in Männerchor,
und bei der Proub – mir söchn’s ein –
dou sauft sa gwiß zwoa Liter … Tee.

Sie führt a nou seit bald oan Jahr
in Völs in nuien Frauenchor.
Und sauft dort – mir derfrougn’s eh –
exakt die gleicha Lacka … Tee.

I geah, so håt der Markus gsågt,
mit mein Våtter af die Jågd.
I schiaß die Böck, des gfållt mer schian,
der Dave kunn af die Antn giahn.

An schianern Christbam, schianern Soul
håbm dia in Hatting ållamoul.
Und bald håbm dia – ja Scheibenkleister,
a nou in schianern Bürgermeister.

RITTERSLEIT

Wer Straßenschilder ungschafft håt,
mecht wissen der Gemeinderåt,
der Ritter Heel kråtzt sich am Oahr,
er hatt’s woll g’wisst, ihn frågt lei koa’r.

Wortgefechte wie noch nie,
wo ist sie hin, die Harmonie?
Wo einstmals Liebe, zischt heut Dampf:
Dave und Kurt im Hahnenkampf!

Inser Musig isch fei guat,
Wertungsspiel liegt ihr im Bluat!
Und wenn sie spielt, no’r giahn mir los’n
nach Tansania oder Bozn.

Hauptschual – wenn ös kriagts an Preis,
nemmts a Geld für enkern Fleiß!
Derleast’s die Gmoan vun ihre Pflichtn,
tiats enk die Hitt’n selber richtn!

A gschmachigs Brot måcht inser Bäck
dös meiste bringt er a guat weck,
lei Semml moug i weiß, nit schwårz,
weil i sinsch wia a Muli fårz.

In an Hotel in Toronto
dou schleicht a Manndl au und o.
Dös isch nit der Winneto,
der Siggi isch’s – der suacht a Klo.

Mei liaber Ritter Stefan Hasl,
wous bist denn du decht für a Fasl!
Kannsch nit, stått sie im Moor z’versenkn,
die Schuach in die Rumänen schenkn?

Gemeindewouhlen miaß mer giahn,
mir glabm, dou werd si nit viel tian.
Und Bürgermoaschter – wous sollsch toan?
An greaßern kriag mer wieder koan.

Dou kemmen ållerhant’ge Gäst
zu sou an groaßn Schütznfest.
Und eines gabs bisher noch nie:
die Ringer als Security.

Vom Ringkampfsport, fair und gediegen
der Korler – Clan isch ausgestiegen.
Iatz kennen sa in Hatting tobm,
dou gibts Club für ganz die Grobm.

Geahsch du z’Martini in die Kirchn,
isch’s besser, du geahsch nit z’weit firchn,
weil dou håt ohne jed’s Gewissen
vun Mitteramüller `s Rouß hing’schissn.

AUF DER SEE

In Toblatn a Kuchl brennt,
sogår der Klaus af oamal rennt.
Und wenn dia Kastlen a nou rauchn,
der Friedl kunn dei sicher brauchn.

Der Pfårrer håt als Praktikant
an Louter aus dem Bayernland.
Jå dös isch woll a rechter Seg’n,
im Widum tuats iatz Weißbier geb’n!

Im Ålm – Sea schwimmt a Nåcketer,
es siecht mi koaner, moant hålt er!
Dou schreit und juzt im Kälterausch
der hochwürd’ge Herr Pfårrer Tausch.

Recyclinghof hab’m mir iatz glått,
wia für a mittlgroaßa Stådt,
doch sind die Folgeschäden groß:
der Trenser isch iatz årbeitslos!

Dös Postamt, dös werd ausquartiert,
wer dös woll übernehmen wird?
oan habm mer gfrågt – der nahmets glei,
am Mullplatz werd der Trenser frei.

Kindergarten wunderbar,
gratis iatz schun åb 3 Jahr!
Gnummen wer’n aus alle Häuser
die Kindsköpf und die Hosenscheißer!

Weihnachtsfeiern für die Åltn –
Schwårz, Roat, Gmoan hobn åbgehaltn,
und nägschts Jåhr kemmen nou derzua
die Wårmen, aber no’r isch’s gnua.

Familienmess hatt’s sollen wer’n,
die Fråtzn treibn’s bunt und plärr’n,
schlåfn oder spielen Bagger –
Orgelkonzert für Hosngagger!

Wåcker wollt’ als Präsident
den Gurschler Hias, weil der isch brennt.
Er bleibt bei ins, isch dös nit schian?
Und Wacker kunn iatz gagg’n giahn.

Feuerwehralarm im Mous,
dou joug´n die Fuierwehr’ler lous.
Die Gritsch – Buabm hobm ålles mit,
lei hålt in Vatter, den gråd nit.

Für ins’re nuie Dorfeinfåhrt
an Numen find’n, dös isch hårt.
Er soll nit groub sein, a nit seicht –
Zeppelin – Boulevard vielleicht?

Åb Ållerheilign Winterzeit,
åb Oastern Summer, dös isch gscheid.
Der Pfårrer håt – dös war decht glåcht –
dia Summerzeit katholisch gmåcht.